poem

                                          

                                       ക്ഷമാപണം

ക്ഷമ ചോദിക്കട്ടെ ഞാന്‍,

              നിന്റെ സ്വപ്നങ്ങളിലേക്ക് കടന്നു കയറിയതിന്

              അറിയാതെ നിന്റെ ഹൃദയത്തില്‍ തൊട്ടു പോയതിന് 

             മോഹക്കിളികളെ കൊടും വേനലിലേക്ക് ഉണര്‍ത്തി വിട്ടതിന്

             കോടമഞ്ഞിലും നിന്നെ തഴുകാത്തതിന് 

                         

             നിന്റെ മനസ്സിലെ തൂവെള്ള കടലാസ്സില്‍

              എന്റെ ഈറന്‍  കവിതകള്‍ കുറിച്ചു പോയതിന്  

              കണ്ണീരണിഞ്ഞിട്ടില്ലാത്ത നിന്റെ മിഴിയിണകളെ 

              തുലാവര്‍ഷ രാത്രികളാക്കിയതിന് 

              നിന്റെ  മനസ്സില്‍ മഴ പെയ്യിക്കാത്തതിന്  

              കണ്ണുകളോട് കഥ പറയാത്തതിന്

              നീ കൊതിച്ചതിലേറെ എന്നില്‍  തുളുമ്പുന്നുണ്ടായിരുന്നിട്ടും 

              എന്റെ  പ്രണയം നിനക്ക് പകരാത്തതിന് 

               ഒടുവില്‍ ഞാന്‍ തിരിച്ചിറങ്ങുമ്പോള്‍  മായ്ക്കാനേറെ ശ്രമിച്ചിട്ടും 

               എന്റെ പാദമുദ്രകള്‍ മാഞ്ഞു പോകാത്തതിന്........... 

ഒരിക്കല്‍ക്കൂടി ക്ഷമ ചോദിക്കട്ടെ ഞാന്‍.......

                                                                                                                                   07.08.2004

                                                                   000                                                               

poem

                                                            

                                    ചക്രവാളം       



             ഇത്  നിനക്കായി  ഞാന്‍ കുറിക്കുന്ന അവസാനത്തെ കവിത

             ഇത് നിനക്കായി ഞാന്‍ തരുന്ന ഒടുവിലത്തെ മിഴിപ്പാട്

             ഇത് നിന്നില്‍ നിന്നും ഞാന്‍ പറിച്ചെടുക്കുന്ന എന്റെ വ്രണിത ഹൃദയം

             ഇത് നിനക്ക് നേരേ വേദനയോടെ  അടക്കുന്ന മനസ്സിന്റെ കിളിവാതില്‍

             ഇത് വേഴാമ്പലിന്റെ ചുണ്ടിലൂടെ ഊര്‍ന്നു വീഴുന്ന  ഇറ്റു ദാഹജലം

             ഇത് ഗംഗയിലൊഴുക്കുന്ന നിന്റെ സ്വപ്നത്തിലെ മയില്‍പ്പീലിത്തുണ്ട്

             ഇത് കഴിഞ്ഞ് നിന്റെ നഷ്ട പ്രണയത്തിന്റെ സഞ്ചയനം

             ഇത് എന്റെ നോവുകളുടെ കൂട്ടത്തില്‍ ഏറ്റവും പുതിയത്

             നീ  ഈ ത്രിശങ്കു സ്വര്‍ഗ്ഗത്തിലെ പാരിജാതം .
                                                                                                                                      08.08.2004    

minikkadha

                                     കള്ളന്റെ സമ്മാനം

        "വര്‍ഷങ്ങള്‍ക്ക് ശേഷം ഈ മണ്ണില്‍  കാല് കുത്തിയതും ഒരു കൂരിരുട്ടില്‍." അയാള്‍ വാച്ചിലേക്ക് നോക്കി .സമയം 9.55. "ഓട്ടോറിക്ഷ സ്റ്റാന്‍ഡിലേക്ക്   പോയാല്‍  ഒരു പക്ഷെ ഓട്ടോ കിട്ടിയേക്കും "

    വലത് കൈയില്‍ നിന്നും പെട്ടി ഇടത് കൈയിലേക്ക് മാറ്റിക്കൊണ്ട്  അയാള് വേഗം നടന്നു.‍

  കളിച്ചു രസിച്ചു നടന്ന ബാല്യവും കൌമാരത്തിലെ പ്രണയസാമ്രാജ്യവും  അയാളുടെ  സ്മൃതി  മണ്ഡലത്തില്‍  കയറിയിറങ്ങി. ജീവനുതുല്യം    സ്നേഹിച്ച രാധ.....അവളുടെ  ചേട്ടന്മാരുടെ  കൈക്കരുത്ത്......ഒടുവില്‍  ഒരു  പാതിരാത്രിയില്‍  അവളുടെ   കല്യാണത്തലേന്ന് നാട് വിട്ടത് ..........

        "അനങ്ങിപ്പോകരുത്"  പിന്നില്‍  നിന്നും  ഉയര്‍ന്ന  ആ  ശബ്ദത്തിന്റെ മുഴക്കം   ഒരു  ചങ്ങലയായി  അയാളുടെ  കാലില്‍  വീണു .

         അയാള്‍  ചുറ്റും നോക്കി. വിജനമായ  പ്രദേശം.  കുറച്ചകലെ  ഒരു  കുടിലില്‍  നിന്നും   അരിച്ചു  വരുന്ന  പ്രകാശമേ  കാണാനുള്ളൂ.    മേഘക്കൂട്ടങ്ങള്‍ക്കിടയില്‍ നിന്നും  ചന്ദ്രന്‍  മെല്ലെ  തല നീട്ടി. ആ  വെളിച്ചത്തില്‍  കഴുത്തിനു  നേരെ  നീണ്ടു  വന്ന  കത്തിയുടെ  തിളക്കം  അയാള്‍   കണ്ടു.

      "തുറക്കെടാ പെട്ടി"     വീണ്ടും  കള്ളന്റെ  ആജ്ഞ.

     അയാള്‍ പതിയെ പെട്ടി താഴെ വച്ചു പിന്നെ വിറയ്ക്കുന്ന  ശബ്ദത്തില്‍ പറഞ്ഞു. "പ്രിയപ്പെട്ട  കള്ളാ ... അഞ്ചുപത്ത്  കൊല്ലം  ഗള്‍ഫില്‍  കിടന്ന്‍  കഷ്ടപ്പെട്ടുണ്ടാക്കിയതാ .....എന്നെ  വീണ്ടും  നാട് കടത്തരുത് "

     പക്ഷെ  ആ  കാട്ടാളന്‍  അത്  കേട്ടില്ല. കത്തിയുടെ  വായ്ത്തല  അയാളുടെ    കഴുത്തോടടുപ്പിക്കുകയാണ്‌  കള്ളന്‍ ചെയ്തത്.

     തുറന്ന  പെട്ടിയിലേക്ക്  ആര്‍ത്തിയോടെ  നോക്കിയ കള്ളന്റെ  മുഖം  വിവര്‍ണമാകുന്നത്  അയാള്‍  കണ്ടു. "ഇതാരാ?" മുകളിലായി  കണ്ട  ഫോട്ടോയിലേക്ക്  നോക്കി   കള്ളന്റെ  ചോദ്യം. 

     "എന്റെ  കള്ളാ,  അത്  പണ്ട്  ഞാന്‍  സ്നേഹിച്ചിരുന്ന  പെണ്‍കുട്ടിയാ.....    ഇപ്പോള്‍  ആരുടെയോ  ഭാര്യയായി  സുഖമായി  കഴിയുന്നുണ്ടാവണം. എനിക്ക്  മറക്കാന്‍  പറ്റാത്തത്  കൊണ്ട്  സൂക്ഷിച്ചതാ   ഈ   ഫോട്ടോ ."

        കള്ളന്‍  ഗര്‍ജ്ജിച്ചു. "നടക്ക്." കത്തി  ഒന്ന് കൂടി  കഴുത്തില്‍  അമര്‍ന്നു.  കത്തിയുടെ  പ്രേരണയില്‍  മുന്നോട്ട് നടക്കുമ്പോള്‍  അയാള്‍  നിര്‍വികാരനായിരുന്നു .  അകലെയായി  കണ്ട  വെളിച്ചത്തിന്         മുന്നിലെത്തി  അവര്‍ നിന്നു.  കള്ളന്‍  വാതിലില്‍  മുട്ടി വിളിച്ചപ്പോള്‍  ഇറങ്ങിവന്ന  രൂപം  കണ്ട്  അയാള്‍  ഞെട്ടി. ക്ഷീണിച്ച്  എല്ലും  തോലുമായ  ഒരു  രൂപം ....തന്റെ  രാധ; കൂടെ  അതിലും  കഷ്ടമായി  രണ്ടു  കുട്ടികളും.

         സ്വപ്നത്തിലെന്നോണം   നിന്നുപോയ  അയാളെ  കള്ളന്‍  വീണ്ടും  ഉണര്‍ത്തി. "ഇതാ  നിങ്ങളുടെ  കാമുകി. ഇവള്‍ക്ക് കൂടി  വേണ്ടിയാ ഞാന്‍   കള്ളനായത്. എന്തായാലും  നിങ്ങള്‍  വന്നല്ലോ,  കൊണ്ടു  പൊയ്ക്കോള്ളൂ. ഇവളെ  കൊണ്ടു  പോകുമ്പോള്‍  രണ്ടു  കൊച്ചുങ്ങള്‍  ഫ്രീ ........"

            നനഞ്ഞ  കണ്ണുകളുമായി  കള്ളന്‍  അടുത്ത ഇര തേടി  നടന്നു. 

                                                                                                                  03.01.1998                   

song

                                                                          ഗാനം

                                                  ചന്ദ്രിക ചിരി തൂകും നേരമായി

                                                  നീലാമ്പല്‍ പൂക്കുന്ന യാമമായി

                                                   ദൂരത്ത്  രാപ്പാടി ഏകനായ് പാടുന്നു

                                                   ആര്‍ദ്രമാം അനുരാഗഗാനം

                                                   കാമുകനാം കുളിര്‍ കാറ്റിന്‍  തലോടലില്‍

                                                   അരിമുല്ല കോരിത്തരിച്ചു നില്‍ക്കെ

                                                   ജാലകവാതിലില്‍ ഒറ്റയ്ക്കിരിപ്പൂ ഞാന്‍

                                                   സ്വപ്നസഖീ നിന്‍ സ്മൃതികളോടെ

                                                   നിത്യം കിനാവില്‍ വരുന്നോരു സുന്ദരീ

                                                   എന്നുമെ‍ന്‍  രാവുകള്‍ ധന്യമാക്കാന്‍

                                                   എങ്ങു  വിടര്‍ന്നു  തുടുത്തു  നില്‍ക്കുന്നു  നീ  

                                                   എന്‍ സ്വപ്നവാടിയില്‍  മാത്രമാണോ

poem

                                                      മാറ്റം


എന്റെ   ചുണ്ടുകള്‍ കറുത്ത് തുടങ്ങിയപ്പോള്‍ നീയറിഞ്ഞു


ഞാന്‍ പുകവലി  ശീലമാക്കിയിരിക്കുന്നു


എന്റെ കാലുകള്‍ നിലത്തുറക്കാതായപ്പോള്‍  നീ  കണ്ടു


ഞാന്‍ മദ്യപനും കൂടിയായിരിക്കുന്നു


വാക്കുകള്‍ ഭാവം  പകര്‍ന്നപ്പോള്‍  നീ  സ്വയം പറഞ്ഞു


അവന്‍ മുരടനായി രിക്കുന്നു


കണ്ണുകള്‍ കുറുകിത്തുടങ്ങിയപ്പോള്‍ നീയറിഞ്ഞു


നിന്റെ സിരകളില്‍ ഞാന്‍ ഭയമായി കൂടുകൂട്ടുന്നു


വിയര്‍പ്പില്‍ നിന്നും  ദുര്‍ഗന്ധമുയര്‍ന്നപ്പോള്‍ നീ കണ്ടു


ഞാനാകെ ദുഷിച്ച് പോയിരിക്കുന്നു


എന്നിട്ടും ......


നീയെന്നെ വെറുക്കാതിരുന്നപ്പോള്‍ ഞാനറിഞ്ഞു


എന്റെ നെഞ്ചിടിപ്പിന് നിന്റെ നിശ്വാസത്തിന്റെ ‍താളമായിരുന്നു


ഹൃദയം നിറയെ നിന്റെ കണ്ണുനീരായിരുന്നു


                                                         000